Augustin Antoine, Minis Edikasyon nasyonal ak fòmasyon pwofesyonèl (MENFP), mande tout ajan edikatif nan peyi a pou yo respekte desizyon Leta pran sou rantre lekòl ane 2024 la, ak tèm «Restore otorite lekòl». Nan yon konferans pou laprès jedi 5 septanm nan, minis lan kritike dezòd ki genyen nan kèk lekòl piblik ak prive, kote moun ap meprize mezi ki deja etabli. Li anonse sèvis enspeksyon ministè a ap travay djanm pou mete lòd nan sistèm nan.
Minis Antoine denonse direksyon lekòl prive yo ki ogmante frè eskolè yo san kontwòl, pandan y ap egzije pèman an dola ameriken. Li raple tout lekòl dwe suiv regleman yo, si se pa sa, gen sanksyon ki prevwa, tankou retire lisans fonksyonman lekòl ki pa suiv prensip yo.
Li enfòme tou rantre administratif la ap demare 16 septanm, ak rantre ofisyèl lekòl la fikse pou 1e oktòb 2024. Pou lise yo, frè eskolè pou ane a fikse a 1500 goud. Elèv ki nan premye ak dezyèm sik lekòl nasyonal yo pa gen frè pou peye, e leta ap bay 400 goud pou chak elèv nan lekòl sa yo.
Minis lan mande pou chak lekòl òganize seremoni monte Drapo nasyonal la chak maten. Li te akonpanye ak plizyè gwo responsab MENFP pandan konferans sa a, ki make yon apèl pou ranfòse disiplin nan lekòl nan tout peyi a.
