Enstitisyon Lapolis la anonse, nan yon kominike, ke li rive debloke wout nasyonal nimewo 8 la nan awondisman Kwadèboukè, jou ki te vandredi 6 septanm 2024 la.
Pou akonpli misyon sa a, ajan jiridiksyon Kwadèboukè yo te resevwa èd nan men inite UDMO/Lwès-2 ak seksyon anjen lou PNH la, dapre sa nou li nan kominike a.Yo mete ansanm pou retire yon gwo mi gang kriminèl 400 Mawozo te monte sou wout la. Baryè sa a te vize bloke fòs lòd yo pou yo pa rive fè operasyon nan kad misyon pou demantle gang yo nan divès zòn.
Toujou dapre kominike Napolis la, pandan operasyon an, bandi yo te eseye atake fòs lòd yo avèk kout bal epi yo te lanse kòktèlmolotòv sou polisye yo. PNH la fè konnen, malgre atak sa yo, gras ak disiplin ak pwofesyonalism polisye yo, entèvansyon an te reyisi san anpil difikilte.
Wout la kounye a ouvè epi lib pou popilasyon an ka sikile. PNH la di l ap kontinye mennen operasyon li yo pou mete fen nan fwaye gang yo, pa sèlman nan Kwadèboukè, men toupatou nan peyi a.
