UNICEF lanse, lendi 9 septanm 2024 la, yon inisyativ ki rele “Gita pa m lan sonnen pou lapè”, nan objektif pou pwoteje timoun ayisyen yo kont danje ki lye ak gwoup ame yo. Pwojè sila a se atis Jean Jean Roosevelt, anbasadè nasyonal UNICEF, k ap dirije l.
Dapre yon kominike pou laprès UNICEF, inisyativ “Gita pa m lan sonnen pou lapè” gen pou objektif sansibilize jèn, adolesan ak kominote a an jeneral sou risk vyolans ame yo. Li pral gen ladan atelye mizik, dans ak teyat, tankou kreyasyon chante pou pledwaye, leson gita ak atelye pou fè gita. Aktivite yo pral gen ladan tou elaborasyon ak difizyon mesaj kle sou danje rekritman ak konsekans vyolans ame yo, atravè rezo kominotè, medya ak U-Reporters.
“An Ayiti, kilti pa sèlman yon pati nan idantite nou, li se yon zouti pwisan pou chanjman,” te deklare Jean Jean Roosevelt. “Atravè mizik ak atizay, nou ka rive jwenn ak enspire jèn yo, bay yo yon altènatif fas vyolans ak yon vwa pou avni yo”. Atizay ak mizik te toujou yon pati entegral nan kilti nou ak rezistans nou. Inisyativ sa a reflete fòs tradisyon nou yo ak espwa nou genyen pou yon avni pasifik”, te pouswiv UNICEF nan kominike pou laprès la.
Bruno Maes, reprezantan UNICEF an Ayiti, te konkli nan mete aksan sou inisyativ la nan deklarasyon li “inisyativ la non sèlman bay yon platfòm pou ekspresyon kreyatif, men tou, ankouraje yon sans de kominote ak espwa nan mitan defi aktyèl yo. Ansanm, nou ka transfòme kè yo ak lespri jèn yo nan ofri yo yon avni kote mizik, atizay ak lapè rezone pi fò pase zam.”
Pa bliye Ayiti ap travèse kounye a yon peryòd gwo kriz. Konfli ant gwoup ame yo, latwoublay sivil ak katastwòf natirèl agrave pi plis defi peyi a ap fè fas. Dapre UNICEF, “plis pase 1.3 milyon timoun afekte pa twoub sivil ak vyolans gwoup ame yo. Nan Pòtoprens ak kèk pati nan anba depatman latibonit la, dè santèn milye timoun te oblije kite kay yo. Gen kèk ki twouve yo nan mitan zak vyolans yo tankou moun ki blese oswa moun ki mouri, pandan ke lekòl, lopital ak kay vin yon chan batay.
